الإعلامية هلا حداد في عيد الأم تكتب عن الأم الدولة،المثال والوطن: “بدنا وطن.. بيشبه أمهاتنا”!

الصورة أعلاه من تصميم وتنفيذ المخرج Garabet Tahmajian

أمي.. رئيسة مجلس نواب بيتنا.. بتشرّع قوانيين لحمايتنا كلنا، مش لحماية الأقوياء واستضعاف الأغلبية، وما بتخبي بالجوارير شي مفيد لاولادها، وما بتعمل اجتماعات لتمييع البحث بشؤون ملحة، ولا بتزرع القسمة بين أفراد العيلة.. ولا بتستغلّ موقعها ليستفيدوا جماعتها..

أمي.. رئيسة حكومة العيلة، بتدبر وبتابع كل شؤون الوزارات ومعها ما في خوف ع الاستقرار والامن الغذائي، كل شي ماشي حسب الدستور والقانون قصدي حسب الاصول..

أمي.. وزيرة المالية، حريصة على كل قرش بيدخل عالبيت لينصرف بالمكان والحاجة المناسبين..

أمي.. وزيرة الدفاع، ما بتخلي حدا يتعدّى على حدودنا، أو ينتهك أجواءنا، أو يكزدر على أرضنا بدون حق، أو يسرق حقنا بدون ردة فعل..

أمي.. وزيرة الصحة، بتسهر على سلامة كل واحد منا، وبتعمل المستحيل لتخفف والوجع وتأمن الدوا..

أمي.. وزيرة الخارجية، قمة بالدبلوماسية مع كل الأطراف الخارجية إن كانت من ميلة والدي الله يرحمه أو من ميلة عيلتها…

أمي.. وزيرة الطاقة، ما بتستسلم لأي أزمة وبتضلّ تبتكر حلول لتأمين بديل للكهربا، ولو عن طريق قنديل كاز، أو بريق فخار و.. وما عندها مانع تعطي دروس للجيل الجديد عن كيفية تعباية المياه من الحاووز.. وبخصوص المحروقات: الموقدة جاهزة إذا ما في غاز، و “أوتو 11” بديل عن السيارة إذا ما في بنزين..

أمي.. وزيرة التعليم بمدرسة الحياة، لا طلبت زيادة ع الراتب، ولا نطرت سرعة الانترنت لتعلّمنا القيم قبل دروس الحساب واللغات والعلوم..

أمي.. وزيرة السياحة، ما في ولا دعاية سياحية بتنافسها وقت تخبر عن قلعة بعلبك ومهرجاناتها، عن قلعة جبيل وتاريخها، عن كل أرزة وتحفة بهالبلد.. وما في حدا بنافسها بتقديم المطبخ اللبناني..

أمي.. وزيرة الإعلام، بتعرف شو بينقال وشو ما بينقال وين وكيف وقدام مين..

أمي.. وزيرة الزراعة، ايدها خضرا شو ما زرعت بينمى وبزيد..

أمي.. وزيرة الصناعة، من لا شيء، لبسنا من شغل ايديها أحلى كنزات وبرانيط وثياب..

أمي.. وزيرة الأشغال والنقل، بدون دراسات مكلفة واستثمارات موجعة ما في ولا جورة ببيتنا، والنقل المشترك منظم بكل الاتجاهات..

أمي.. وزيرة الاقتصاد، بتعرف كل شي ناقصنا ومن وين لازم نشتريه وبأي سعر، وما بتخلّي حدا يتحكم فينا لا بالاحتكار ولا بالاستغلال..

أمي..وزيرة العمل، عندها تنظيم دقيق مع توزيع مفيد لشغل البيت..

أمي.. وزيرة التنمية الإدارية، سر هالوزارة انو ما حدا منا بيعرف شو دورها.. بس أمي بتعرف كيف تخطط وتواكب العصر لتنمية العيلة…

أمي.. وزيرة الشباب والرياضة، بتتعاطى مع احفادها كأنها بنت جيلن..

أمي.. وزيرة البيئة، بطريقة غرائزية بتحمي كل موارد الكرة الأرضية وبتعطي دروس لأهم منظر بيئي من رواد الجمعيات البرستيج..

أمي.. وزيرة الاتصالات، يللي ما احتاجت لخطوط ثابتة أو خليوية أو انترنيت لتعمل علاقات إنسانية بمحيطها.. استعملت خطوط الود والمحبة…

أمي.. وزيرة الداخلية، لا عندها درك ولا أمن عام ولا دوائر نفوس، لكن نجحت بفرض القانون والنظام بهيبتها كأم..

أمي.. وزيرة المهجرين، لأن عاشت التهجير، بتشتغل ليل نهار لتمنع اي خطاب برجعنا لزمن التهجير…

أمي.. وزيرة الشؤون الاجتماعية، بالفعل مش بالقول، بتعرف المحتاج وبتعمل واجباتها بدون طنة ورنة..

أمي.. وزيرة العدل، ما درست القانون، لكن عادلة لأن بتعرف كثير منيح مضمون الكتب السماوية..

أمي.. وزيرة الثقافة، بحياتها ما في غير ثقافة الأخلاق وبتعمّم مفهوم العيب يللي انقرض بهالايام..

أمي.. حاكمة مصرف لبنان الأمينة، قائدة الجيش الوفية، المدعية العامة الشريفة، المستشارة النزيهة..

أمي.. امرأة من نساء الأديان المحبة والمتسامحة والغفورة و..

أمي.. رئيسة بلدية ومختارة..
أمي.. رئيسة جمعية ونقيبة ورئيسة اتحاد..

أمي.. تتقن كل المهن الحِرَفية أو الحرة لكن بدون فساد وبكل آدامية..

أمي.. رئيسة جمهورية ورغم انو ما عندها كثير من الصلاحيات بتحاول بما تَيَسّر، تمنع التفريط بحقنا وبتردع الأطماع وبتتحايل عالتناقضات لتحمي العيلة..

وقت تكون هيدي صفات أمي، اقل الإيمان كون عم بحلم بوطن بيشبه أمي..

بعتقد أغلب أمهات بلادي مثل أمي.. لهيك بدنا وطن بيشبه أمهاتنا.. وليهك رح يضل عنا أمل ورجا إنو الام هي الوطن والوطن هو الأم..

كل عيد أم وكل أمهاتنا بخير وصحة.. والله يرحم الأمهات المنتقلات لجوار الرب..

التعليقات