“بعد 4 آب بلّش التطاول”.. نكبات بيروت الفنية/ بقلم الإعلامية هلا حداد

كتبت: هلا حداد

بيروت كسُمعة، أهم من كل الخبريات، كحضور اكبر من مساحتها ومعالمها، بيروت كصمود أسطورة، بيروت آلهة الوجود وحقيقة العبور..

ومينّي انا لأكتب عن بيروت المجروحة والموجوعة والمنكوبة والمصدومة، بيروت الثائرة والمتحرّرة والمنتفضة، بيروت اللي ما بتموت، بيروت التناقضات، بيروت ساحرة الاجيال، بيروت التاريخ والجغرافيا والعلوم والفنون، بيروت الخليط البشري، والتنوع الإيماني..

اللى بعيش ببيروت، بيتمشى بشوارعها بخجل أمام فكرة مين مرق قبلو بهالشوارع وشو ترك من آثار ثقافية وانسانية واقتصادية وعمرانية و..

اللى بعيش ببيروت بزور العالم.. فخلف كل حجرة وقدام كل شجرة وفوق كل سطح وتحت كل جسر في سر.. وأسرار بيروت حبوب قمح من حصاد الايام..

اللى بعيش ببيروت بيشرب عنفوان، وبيتنفس كرامة وبيسكر محبة، وبيعشق تفاصيلها، هي سكر وملح الحياة..

وبرجع بسأل ميني انا لاحكي عن بيروت، قدام كبار حبوها، عشقوها، تغزلوا فيها، غنوها، صوروها، وهي الخالدة تخلدوا وقت خدموها بالكلمة والصوت والصورة..

بعد نكبة ٤ آب بلش التطاول ع بيروت..

وصار كل مين بيعرف يكتب كلمتين، ينصّ قصايد لبيروت، ونحن نترحم ع نزار قباني..

وكل مين مصدق انو  صوته حلو.. “ينشز” غنية “لبيروت” ونحن نقول الله يطول بعمر السيدة فيروز..

وكل مين حمل كاميرا يغمض عينه عن جمال بيروت ويفتش بس عالبشاعة..

وكل مين حمل ريشة، خربش بيروت ع لوحة فوضوية بالوان سوداوية..

وكل مين بفكر حالو عبثي عمل مجسم وانتهك حرمة جسد بيروت،

وكل مين بحب خشبة المسرح عربش بمهزلة ومثّل بيروت..

وكل مين بدو شهرة سريعة ركب موجة بيروت..

بالمقابل في أعمال بتستحق التقدير والاحترام والاعتراف بموهبة اصحابا لكنها قليلة حد المد الصاخب لشي أصحابه بسموا “إبداع”..

بكرا رح تستعيد بيروت عافيتها، مثل بعد كل حرب وكل زلزال وكل كارثة وكل مؤامرة..

وفي أجيال جايه رح تفتش بغوغل لتتعرف ع بيروت زمان ورح تكتشف نكبات بيروت المأساوية ونكبات بيروت الفنية.. لهيك منقول: ارحموا حالكن وارحموا بيروت، بتحبوا بيروت ما تستغلوها.. مش ناقص بيروت استغلال باسم الفن، اللى فيها بكفيها من استغلال سياسي واقتصادي ومالي واجتماعي ومعيشي و….

بيروت عذريني، دفاعاً عنك عملت مثلن، ركبت موجتك وكتبت عنك..

الصور من صفحة صورتك صورة لبنان https://www.facebook.com/groups/382669129617711

 

 

التعليقات