اللوحة أعلاه من تصميم وتنفيذ المخرج: Garabet Tahmajain
حل فصل الربيع وبقيت الشتوية..
انطلقنا بالتوقيت الصيفي وبقيت الشتوية..
معقول تجي الصيفية وتضل عنا الشتوية؟
بمناسبة دخولنا بالعصر شبه الجليدي أو الزمن القطبي.. رح قدم أبرز وأهم دراسة نفسية، بيولوجية، اجتماعية، Yقتصادية للتكيّف مع حدة الطقس..
تبيين نفسياً انو الإنسان قادر يتأقلم مع متغيّرات الطقس، إذا كان محصن ومدرب.. وتبيّن انو الجسم البشري بيخزن المعادن والفيتامينات والكالوريات، إضافة إلى تخزينه الدهون والسكر وكثير من المواد، من هالمنطلق أكيد هو قادر يخزن بالذاكرة وكمان بالجلد، البرد القارس لاستعماله تبريد جسدي للصيف، وأيضاً قادر يخزّن الحرّ القاسي بالصيف لاستعماله للتدفئة بالشتي.. السؤال كيف؟
⇓⇓ ⇓⇓ ⇓⇓ ⇓⇓ ⇓⇓ ⇓⇓ ⇓⇓ ⇓⇓ ⇓⇓ ⇓⇓ ⇓⇓ ⇓⇓
الأمر بسيط: ليش سكان المناطق الباردة بأوروبا وكندا وروسيا عندن قدرة عالية على تحمل البرد القارس بدون انزعاج مثلنا؟ وليش سكان المناطق الأفريقية الحارة بيعتبروا الشوب عنا نزهة..
بكل بساطة لأن عندن قدرة التأقلم والتخزين..
تخزين البرد والشوب، رح يخفف مصاريف التدفئة والتبريد، والتخزين بحاجة لفهم علم النفس..
فمثلاً: الشعور بالخوف بيخلينا نشعر بالبرد، لهيك بالصيفية لازم نبتكر أحداث مخيفة..
بينما الغضب بيرفع حرارة الجسم، لهيك بالشتوية ضروري نستجلب كل الأحداث يللي بتدعينا للغضب..
حصر البول بخلينا نشعر بارتفاع درجة حرارة جسمنا، بينما الخمول وقلة الحركة بخلينا نشعر بانخفاض درجة الحرارة، لهيك لازم نعرف اي متى “نعيش” هالتجارب..
هيدا نموذج زغير عن قدرات التخزين البرد والشوب لنقلل مصاريف التدفئة والتبريد، ونوقف نق، وأعتراض على متغييرات الطبيعة..
رغم الحكي انو الصيفية القادمة رح تكون حارة جداً توازي البرد يللي عشناه بالشتوية، حسب نظرية التخزين، ما رح يكون في انزعاج من الشوب، لسبب انتشار سوء التغذية يللي رح يصيب الشعب اللبناني لان ازمتنا المعيشية لحد هلق ما الها حلول، وسوء التغذية من الأسباب المباشرة للشعور بقشعريرة البرد..
أما تخزين الشوب بيكفي استعمال الفلفل “الحرّ”، لتدوقوا طعم الدفا بمفعول متصاعد..
بتبقى نظرية التخزين/ الحرارة المرتفعة والمتدنية، قابلة للنقاش، بعد عدة تجارب عن وضع الذات بظروف مناخية معاكسة عن الظروف يللي عم نعيشها، بطريقة عفوية بعزّ آب اللهاب، اذا تخايلت الثلج رح تشعر بالبرد، وبعز كانون وثلجاته مجرد تخّيل نار ملتهبة رح تشعر بالدفا..
علم النفس الحديث مش تحليل وبس، كمان تطبيق..
ملاحظة: جميع حقوق نظرية التخزين والتأقلم مع متغيّرات الطقس، مسجلة باسمي الشخصي: هلا حداد..
