بقلم هلا حداد
على خلفية التفاعل مع نصي السابق حول مقولة الشيخ المسن الحكيم:” وقت يبلش الشعب يرمي الخبز بالنفايات قولي المجاعة جاية”..
تحركت ذاكرتي بنشاط غير عادي بكواليس علاقاتنا التاريخية والوجودية مع الخبز..
وخلينا نتذكر سوا كيف كنا نعتبر الخبزة نعمة مش حشوة بطن ولا متعة مضغ..
******
- بتتذكروا نحن وزغار كيف كنا نتصرف اذا وقعت خبزة من ايدنا بالغلط، ننحني نرفعها عن الأرض كأنها قطعة من جسدنا نبوسها ونطلع بالسما ونستغفر ربنا وناكلها؟
- بتتذكروا نحن وزغار كيف كنا نتصرف اذا ما قدرنا ناكل كامل سندوتش اللبنة او زعتر وزيت او الجبنة، كيف كنا نحط الباقي ع طاولة المطبخ ونخاف نرميها بالنفايات، مش لان الله بدو يخنقنا، لأن أهلنا علمونا الخبز ما بينكب.. والدجاجة والخروف واي حيوان قريب أحق فيها؟
- بتتذكروا سندوتش المدرسة اديه كانت بسيطة وفيها حب وكرامة وكنا نقول عنها عروس.. ما تشبه سندوتشات ايام العز أشكال وألوان ونكهات وطعمات ويا ريت راضيين؟
- بتتذكروا كيف كانوا الجيران يدقوا بواب بعضن ليستعيروا رغيف الخبز، لأن وصل لعندن ضيوف فجأة، وإذا الجار ما عندو غير رغيف ما يرد جاره ايدو فاضيه؟
- بتتذكروا كيف كانوا اهلنا يستعملوا الخبزة دوا. اذا وقعنا وفدغنا راسنا ياخدوا شقفة خبز مع مياه باردة ويضغطوا ع الاصابة، وإذا في لعيان مضغ خبزة حاف، وقت يتحركوا أسنان الطفل بيعطوا خبزة ليفرك نيرته فيها؟
- بتتذكروا ايام الحرب كيف كنا ننطر بطوابير الخبز وكانت الربطة 12 رغيف.. وبتتذكروا بوقتها كنا ناخد الخبز سخن وقت نوصل عالبيت نفتح كيس النايلون و”نقبع الخبزات” يعني نفصل طبقة الفوق عن طبقة التحت مشان ما يلزقوا ع بعضن؟
- بتتذكروا كان في نوع خبز واحد، مش مثل أيامنا اذا في ٥ أشخاص بالبيت كل واحد بياكل نوع مختلف عن التاني.. خبز ابيض، اسمر، قمحة كاملة، نخالة او شوفان، فرنجي وساج و.. ؟
- بتتذكروا كيف كنا نتضحك ع الأجانب لان بيشتروا خبر كل يوم بيومه وما بخزنوا بالبراد وهني بخبرونا انو الهدف لياكلوا الخبز طازة كمان مشان ما يكبوا الخبز الزايد؟
- بتتذكروا وقت كنا نروح عالمطاعم اللي بتخبز خبز طازة.. توصل سلة الخبز السخن وكيف نقي الأحمر و “المأمّر” ونشتهي ريحتو قبل طعمتو؟
- بتتذكروا وقت كانت ست البيت تحمص الخبز البايت وتخترع اكلة تلبق للخبز المحمص مثل الفتوش والشوربا والفتة كرمال ما تكب الخبز؟
- بتتذكروا وقت الازمات كيف كانت امهاتنا تعمل خبز بالبيت ان كان عالصاج او بفرن الضيعة او عالتنور او الطابوني؟
- بتتذكروا من عجينة الخبز اديه في أنواع من المعجنات مناقيش، فطاير، صفيحة وبيتزا وسبانخ، سنبوسيك و..
- بتتذكروا بـالإنجيل المقدس كم مرة يسوع المسيح اكثر الخبر ليطعمي الجموع.. وبالعشاء الاخير كيف كسر الخبز وشارك تلاميذه؟
فعلا الخبز نعمة وبعدان للشبع، ولو كان الخبز حاجة جسدية
بيبقى خبز الحياة هو الإيمان والمحبة والتسامح.. والقناعة.
