نايا: يا تيتا صوتك بعدو بدنيي عم ترددي اسمي بشكل متواصل، يا ريت فيي رجع الزمن لقبل 25 تشرين الأول، لأعرف شو كان بدك تقوليلي؟ بعدني مخنوقة..
نيقولا: يا ستي وصيتك إلي لدير بالي ع حالي وع عايلتي وع أمي وأختي مسؤولية كبيرة، ع فكرة وعدتني بفطيرة بيض من ايديكِ… رح اشتاق لنَفَسك المحب بالأكل وباللهفة الحارة يا بركة العايلة..
جميل: انتبه ع حالك، انتبه على أمك، بيك بيك.، بيك انتبه عليه، وانت وخيك حبوا بعضكن، صدى كلامتك مرافقني يا ستي، رح تبقي ببالي الحنونة والمحبة وشرطة الأخلاق..
شربل: بتضلك تقولي عني اني اكبر من عمري، وغيابك كبرني اكثر، وجعك وجعنا، وبعدنا مش مصدقين فكرة انك هونيك بمطرح بعيد عن العين رغم هيك رح تبقى بالقلب..
توفيق: مين من بعدك رح يرجعني ع ايام الضيعة يللي كلها خير وبركة.. بخبريات عن ناس من لحم ودم كلن انسانية وشهامة وبطولة وحكمة وتدبير.. رح تبقى سنديانة حب بذاكرتي..
طوماس: رح اشتاق لرفقتك ع الجنينة مطرح ما التراب بيعشق دعساتك، ومطرح ما انا أكتشفت خبرتك بالزراعة والأرض والقطاف.. المواسم كمان رح تشتقلك..
مارك: ان الله راد رح حقق حلمي يللي شجعتيني عليه ورح صير طيارجي، وكلما رح حلق صوب السما، رح شوف وجهك برسمات الغيوم واطلع بعيونك الزرق الحلوين..
روي: تيتا سوسو وقت انزل ع لبنان، ورا مين بدي امشي من المطبخ ع الصالون ومن الصالون ع المطبخ؟ من ايد مين بدي آكل الرز ع الدجاج والملوخية وكل اكلاتك الطيبين؟!ّ رح ضلّ حبك…
موريس: تيتا بدي خبرك سر، بتعرفي ليه كنت اتخبى بوليد وانهرق عليه كلما احكيكي بالفيديو.. كنت عم بتغنج عليكي عن بُعد.. رح اشتقلك..
◊◊◊◊◊◊◊◊◊◊◊◊◊◊
يا امي أحفادك اشتاقولك.. وأول عيد ميلاد رح يمرق علين وانتِ بعيدة عنن.. وبلّشوا يعدّوا المناسبات يللي صارت حزينة على فراقك.. وذكريات عم تتزاحم لأيام كنتي زينتها وكنتي حلاوتها…
يا امي…
أما نحن أولادك صعب نخبرك عن حالنا بغيابك.. لأن كل تفصيل بحياتنا حاضرة فيه..
لكن بدنا نخبرك انو من بعدك صارت ألوان الدني باهتة، وكل أصوات الطبيعة صوتك وكل جمال صورتك وكل ريحة حلوة ريحتك وكل ذكرى منك دمعة، وكلماتك غصات بالبال.. وكل لحظة ع الفراق عم بتزيد الشوق والحنين لحضورك يللي ما في حدا بيعبيه….
يا امي وينك تزرعي محبة بزمن الحقد، وتقطفي أمل بزمن اليأس، وتوزّعي حكم بأيام الجهل، وتعطي دروس بالأخلاق بعصر الفلتان.. وينك تعلمي الأجيال شو يعني مبادئ وقيم..
◊◊◊◊◊◊◊◊◊◊◊◊◊◊
أمي من بعدك رح نعيش العازة والحاجة للحياة.. لأنك أنتِ الحياة..
◊◊◊◊◊◊◊◊◊◊◊◊◊◊
“هي بمطرح أحسن من هون” هالجملة سمعتها آلاف المرات، أوقات بصدّق وبتخايلك مع بيي أبو الياس ببيت من بيوت الملكوت، عم ترافقونا وتحضّرولنا الطريق، وأوقات برفض صدق انكن بمطرح أحسن من هون… لأن هون كان أحسن بوجودكن..
◊◊◊◊◊◊◊◊◊◊◊◊◊◊
يا امي… بعد في حكي كثير… وأكيد بكل الأوقات عم تسمعيه… ورح ضلّ قلك سامحيني وترضّي عليي..
