أنا الموقّعة أدناه، أُقرُّ وأعترف، بصفتي إنسانة غير متخصّصة بالطب، وبكامل إرادتي الحرة من مهنتي، إنو فيروس كورونا موجود وقاتل..
لكن.. بشكّك بسبب انتشاره إذا كان طبيعي أو مُصنّع، ومُقتنعه إنو هالجائحة عندها أبعاد سياسية وأقتصادية وأجتماعية بعد ما تحققت، وبلْشت ألمس تداعيات الإجراءات الوقاية يللي تاخدت على صعيد العلاقات العائلية والإجتماعىة والإنسانية، وبتوقّع الأسوأ ع فئات عُمرية مثل الأطفال والمراهقين والمسنيين..
بالمقابل عندي اعتراض نابع من منطقي الخاص، وبدون أي تأثير لمجموعات أو أفراد، وبعيداً عن عقدة المؤامرة، وبصلب الحجج غير المقنعة للتسويق الأعمى، وبخاف أكثر من منع أي سجال حول لقاح كورونا، يللي ولد بتنافس دولي خلال أشهر بعد اكتشاف الوباء..
بعرف إنو يللي بدي قولو رح يعرّضني لانتقادات، وربما أكثر، وبعرف إنو ممنوع نطرح هالهواجس، وما بعرف شو السبب: خوف من تحريض الناس؟ أو خوف من قطع أرزاق المصالح الطبية والخاصة؟!!
لكن كمان بعرف إنو في كثار بيفكروا مثلي ورح فشّلن خلقن..
لهيك رح اطرح مجموعة أسئلة، سمعت بعض الإجابات عليها وبعد ما اقتنعت، ربما لاقي مين يغير رأيي:
ليه منظمة الصحة العالمية ما بتنشر بشكل دوري أرقام الوفيات العالمية بسبب الأمراض الخطيرة كالقلب والسرطان مثلاً، مثل ما بتنشر عدد وفيات كوفيد 19؟ وبصير عنا فكرة كافية بالأرقام، اذا الخوف والرعب يللي انزرع بالنفوس بمطرحه أو لا (!!ّ!)
بفهم تكون الدول والمنظمات والمسؤولين خايفين من انتشار الوباء، وبدّن بشكل سريع علاج أو لقاح، بس ما بفهم أي شخص عندو عقل وضمير وأخلاق يقبل يحوّل البشر ع امتداد الكرة الأرضية الى “فئران تجارب” عالأقل بالنسبة للاضرار البعيدة المدى بسبب تجارب اللقاحات؟ وبالاخص بلّشت التجارب محمية بقوانيين.. والمسؤولية بتوقع ع الأشخاص اللي قبلوا ياخدوا اللقاح ومضيوا ع أوراق واضحة بهالخصوص.. ومع تنصّل الدول بقوانيين لزوم ما لا يلزم… وأكبر برهان رفضوا التحقّق بحالات وفاة وأضرار مباشرة بسبب اللقاح..
- ما بفهم ليه بكل المجالات مسموح يكون في حرية تعبير، ومنظارات إعلامية، حتى بمجال التسلّح وفضائح المخابرات والتجسّس والعمليات السرية والمؤمرات بين الدول في مجال للمناقشات الإعلامية حولها.. إلاّ موضوع فعالية اللقاح، ممنوع، لا بالإعلام التقليدي ولا بالإعلام الافتراضي نحكي عنه.. من شو خايفين؟؟ يللي عندو ثقة بنوعية وجودة إنتاجه ما بخاف من المواجهة..
- شو هالسرّ، خبر عن طلب ترخيص الطعم للأطفال بينتشر مثل النار بالهشيم، بينما دراسة بتحكي عن محدودية فعالية اللقاح، ونتائج الدراسة بتأكد انو الفعالية 94 % بتكون بس لـ 6 ايام وبعدها بتنخفض لـ 40% ولهيك رحنا ع جرعة ثالثة، بتمرق مرور الكرام..
- شو هالخنوع عند المصابيين السابقين بكوفيد 19 أو 20 أو 21 بكل متحوّراته، يقبلوا ياخدوا الطعم، مع انو المنطق بيقول إنو الفيروس دخل جسمنا بشكل طبيعي، والخلايا تعرفت ع شكله، ومفهوم الطعم يُختصر بإدخال الفيروس لتتعرف عليه الخلايا، شو يللي ممكن يضيفوا الطعم ع الفيروس الطبيعي يللي تعرف عليه جسمنا؟؟؟
- ليه ما صار في دراسات ع المصابين بكورونا حول أدّيه بيضلّ عندن مناعة، مقابل أدّيه مناعة اللقاح ولكم من الوقت؟؟؟
- قالوا إنو غير مُطعّم مسؤول مباشرة بنقل العدوة وانتشار الفيروس، ومن بعد ما تبيّن إنو أغلب الإصابات بالأشهر الأخيرة كانت للمُطعّمين، كيف ضميركن بيحمّل مسؤولية نقل العدوى لطرف دون الآخر؟؟؟
- قالوا إنو يللي أخد الطعم إذا انصاب بتكون العوارض عنده أقل، أعلنت بريطانيا رسمياً قبل أشهر إنو أغلب المصابيين يللي دخلوا المستشفيات من المُطعّمين.. شو التبرير العلمي لهالحالات؟؟!!
- قالوا أخد الطعم بيقلّل حالات الوفاة.. في عنّا أرقام صادقة كم شخص أخد طعم وتوفى بكورونا؟؟!!
- ليه حالات الوفاة بعد أخد اللقاح ببلاقوا مية سبب طبي لإلها مثل الجلطة وغيرها وما بيعترفوا بالحقيقة، ع طريقة أغلب مرضى السرطان بيتوفوا بسبب العلاج وبيقولوا بسبب المرض، منفهم إنو حماية دايمة للشركات المصنّعة للأدوية؟؟
- ليه أغلب العلماء يللي اعترضوا عاللقاحات تمّ عزلن أو التشهير فيهم او اعتبروهم خرفانيين، أو مش أهل للاختصاص؟!
ليه كلما خفت وهرة مخاوف الكوفيد بيولد متحوّر جديد؟؟
- والأهمّ.. اللقاح فعال ع كل المتحورات.. يعني خارق (!)
- ليه ما بيتمّ الكشف عن الحسابات الماليه للمُروِّجين بشراسة للقاح، أكانوا في المجال الصحي أو الإعلامي أو السياسي أو بغير مجالات؟؟؟
- هل صحيح أرباح الشركات المُصنعة للقاح يللي أخدت دعم من منظمة الصحة العالمية ومن دولة عظمى واحدة، عدّلت خسائر صناعة الأسلحة لهالدولة؟؟
أكيد ما رح أدخل بأسئلة مباشرة وتقليدية، مثل: شو هي تركيبة اللقاحات؟
وإذا صحيح تم استعمال DNA أجنة ميتة وشو رأي الدين بالموضوع؟
وماذا عن اضرار النانو المتواجد بالطعم ع باقي أعضاء الجسم؟
واذا هاللقاحات بتأثر عالخارطة الجنية؟
واذا للقاحات وظيفة بالسيطرة عالبشر؟
شو علاقة كورونا واللقاح بولادة نظام عالمي جديد؟
وليش ببعض الدول نزلوا الجيش للتطعيم؟
وليش بعد فيه ناس رافضة التطعيم؟
وشو العبرة من منع السفر، أو دخول غير ّ ع الأماكن العامة أو العمل والإنتاج، وإذا هالشي بيطابق مع حقوق الإنسان والحريات العامة؟
شو الخلفيات التجارية المباشرة لكورونا بـ pcr والكمامات وأدوات التعقيم و.. وشو أضرار استعمالات هالعناصر؟
أكيد بعد في كثير من التساؤلات حول كواليس انتشار كورونا- مروراً بتعميم الجرعة الثالثة للقاح- وصولاً لتلقيح الأطفال، قبل الوصول إلى نتائج حاسمة عن عدم وقوع أضرار ع الجسم بالمدى المتوسط والبعيد…
بلبلة عالمية كبيرة عم نعيش فيها بيحمل مسؤوليتها أولاً الاطباء بكل أنحاء العالم…
بحترم الأطباء يللي مقتنعين وعم بيشتغلوا بقناعاتن، وبقدّر الأطباء يللي رأين مثل الطبيب يللي قال لي: “مرجعيتنا العلمية منظمة الصحة العالمية، عم نشتغل بتوجهيهاتها، وما عنّا بديل، وما عندي فكرة شو بدو يصير إذا بعد ١٠ سنيين تبيّين انن كانوا غلطانين”(؟!)، وما بحترم أي طبيب عندو معلومات طبية وعلمية عكس التيار وما بقولها لأن خايف ع موقعه ورزقه، وبحتقر كل طبيب استفاد بدولار أو أكثر، أو تسلّق منصب سياسي بفضل التسويق للقاح..
نعم فيروس كورونا قاتل.. لكن مش قدّ الخوف والرعب منه.. ولا قدّ أسرار اللقاح السحري..
الموقّعة: هلا حداد
