الصورة أعلاه من تصميم وتنفيذ المخرج الفنان Garabet Tahmajian
تسبّبت جائحة كورونا بكوارث إجتماعية وإقتصادية على الفئات المهمشة، وبالأخص النساء والأقليات العرقية غير البيضاء بالعالم، بينما تكبّدت الدول خسائر كبيرة على صعيد الإقتصاد والإنتاج، مقابل تحمل أعباء التغطية الصحية والاجتماعية، حسب تقدمات كل دولة.. وكانت الصدمة بتقرير منظمة أوكسفام (اتحاد جمعيات خيرية بتركز على تخفيف حدّة الفقر العالمي)..
توقف التقرير عند زيادة ثروة أغنى 10 رجال بالعالم من 700 مليار دولار إلى 1.5 تريليون دولار بمتوسط 1.3 مليار دولار باليوم، خلال فترة الوباء وزادت ثرواتن أكثر من الـ 14 سنة الماضية حسب وكالة فرانس برس..
ووصفت منظمة أوكسفام عدم المساواة بالعالم بالعنف الإقتصادي، وأضافت إنو عدم المساواة عم يساهم بوفاة 21 ألف شخص كل يوم بسبب نقص الوصول للرعاية الصحية والعنف القائم عالنوع الإجتماعي والجوع والتغير المناخي، وأشارت المنظمة إنو الوباء أوقع 160 مليون شخص بالفقر..
ومن الطبيعي يكون بيل غيتس من بين أغنى 10 رجال بالعالم وهو يللي دعى قبل أيام الحكومات لرصد المليارات لمكافحة المرض العالمي المقبل.. ومش مستغرب يكون مؤسسا شركة غوغل لاري بيدج وسيرجي برين من بين هؤلاء الأغنياء، إلى جانب مارك زوكروبيرغ مؤسس فايسبوك وجيف بيزوس مؤسس أمازون… ملاحظة سريعة رواد العصر التكنولوجي، مش بس من أغنياء العالم كمان حوّلوا قطاع الإتصال والتواصل إلى حاجة ضرورية بجميع المجالات..
الفقر مش عيب والغنى مش تهمة، لكن لا بد من شوية تساؤلات حول واقع هالأرقام:
⇐ هل جائحة كورونا صدفة لاستبدال الأعمال المكتبية بالمنزلية عن بعد؟
⇐ هل جائحة كورونا كانت مصيبة على قوم واضافت عدد فقراء العالم 160 مليون بينما قوم الأغنياء، زادت خيراتن بالمليارات؟
⇐ فينا نضيف عدد فقراء كوفيد على عدد ضحايا كورونا ليطّمن بال يللي بدو يخفض عدد سكان الأرض؟
⇐ في حدا يقرا هالأرقام ويصدق إنو هالجائحة صفقة عصر المال والأعمال ضدّ البشرية؟
⇐ شو الفرق بين أرباح الدولة الصينية بسبب كورونا وأرباح أغنياء أميركا بسبب الجائحة؟
⇐ فينا نحلّل شو هي القطاعات يللي استثمروا فيها هؤلأء الأغنياء بمرحلة الوباء، إذا كانت كمان أدوية، لقاحات، كمامات، معقمات، و..؟
⇐ وهل وصلنا لمعادلة إذا مش قادر تملك هاتف ذكي ومش قادر تتطبب فإنت غير مرغوب فيك عالأرض؟
⇐ وفينا نتصوّر عالمنا بدون هؤلاء الأغنياء إذا رح يكون أفضل إنسانياً أو فاشل تقنياً؟
الفرق بين فقراء وأغنياء كورونا، إنو الفقراء ضحايا عدم المساواة الأرضية، والأغنياء، ضحايا شيطان العصر أبو ورقة خضرا بدن يستبدله بعملة رقمية..
وبعيداً عن عقدة المؤامرة، نعم دخلنا زمن كل شي مباح لأجل الأرباح ولو كانت أرواح الناس..
