(اللوحة أعلاه للمخرج الفنان Garabet Tahmajian*
مع الضغط الاعلامي والتدابير الخانقة لإلزامية مقنعة للقاحات كورونا، وعشية تحرك مجموعات رافضة لفكرة الطعم وبعدين لإلزامية اللقاح، فيه سلوك مرفوض عند أغلب غير المُلقحين، بيوصل لدرجة التطرف والتعصب والشعوذة العلمية..
كيف ممكن لـ “غير مُلقّح، يقنع الآخر بأفكاره الاستفزازية ما دام بيعتمد على روايات وخبريات، بدل التسلح بالمنطق العلمي والقانوني والدستور؟
ورح نستعرض عدة افكار من افكارن المشكوك بأمرها :
* هل مقنع انو اغلب غير الملقحين بيحكوا عن شريحة عم تنزرع عبر الطعم ليتم السيطرة علينا؟
* هل مقبول ربط الطعم مع الجيل الخامس من الاتصالات G5؟
* من المنطق تسويق فيديوهات لاختبارات أجساد المطعمين على انو فين ذبذبات إلكترونية بتأثر على الأجهزة الذكية؟
* معظم غير الملقحين، عايشين بهاجس نظرية المؤامرة، لدرجة بيعتقدوا انو الطعم قاتل والهدف منه تخفيف عدد سكان الأرض..
* بأكدوا انو الطعم بيعمل عقم، كيف ممكن يحسموا الموضوع إذا اللقاح ما صار عمرو سنتين؟
* بيربطوا اللقاحات بالسياسية، وبقدموا دليل انو منظمة الصحة العالمية اعترفت ووافقت على لقاحات الدول الأعضاء بمجلس الأمن ومش غير دول..
* بيربطوا اللقاحات بالاقتصاد وبيعملوا مقارنة بين موازنات شركات الأدوية والشركات المصنعة للاسلحة؟
* بيربطوا بين اللقاحات والنظام العالمي الجديد بالغاء العملات النقدية المعتمدة لصالح العملات الرقمية؟
* أما وقت يحكوا عن تقنية MRNA فـ.. حدث دون حرج، بيدخل المعتقد الديني مع التحليل العلمي مروراً بالفلسفة الوجودية وصولاً للتطور الإلكتروني..
* أما تغيير الخارطة الجنية لحالها حالة، كيف عرفوا وبعد لحد هلق ما خلق الجيل الأول بعد اللقاح؟
* أما ربط المتحورّات باللقاح فقصة تانية، هني مقتنعين انو الفيروس عم يتمرد ويتحور لأنه عم يتحارب باللقاح..
* وعندن عتب دايم على الإعلام لأن ما بيسمح يشوش الرأي العام حول مصداقية اللقاحات..
* وقمة التطرف عندن وقت يسموا اللقاح بـ “السم الهاري”…
بالمقابل، فيه جماعات من غير الملقحين أقل تعصب وتطرف وممكن النقاش معن وبيطرحوا اسئلة منطقية مثل:
— ليه بدنا نوثق بلقاح ما أخد الوقت الكافي من الاختبار السريري، واستعمل كل سكان الأرض فئران تجارب؟
— اذا اللقاح ما بخلينا نتخلى عن الكمامة والتباعد وما بيمنع العدوى ليش بدنا ناخده؟
— وقت تقلن انو اللقاح بيخفف عوارض الدخول على العناية وبيقلل حالات الوفاة، بيستشهدوا بأرقام بريطانية ومصادر رسمية واعلامية انو 48٪ من المتوفين ببريطانيا من يللي اخدوا اللقاح؟
— أبرز اسئلتهم المحرجة يللي بيستعملوها وما في حدا يرد عليها: شو هي مضاعفات اللقاحات عالمدى المتوسط والبعيد؟
— أما الحجة الاقوى عندن: موضوع الحريات، وعدم إلزامية اللقاح، والتمسك بالدستور والقانون.
بين غير مُلقح مُتطرف وغير مُلقح منطقي.. وبين مُلقح علمي ومُلقح مُتعصب.. بعالم مفروض يكون حر، كيف ممكن تكون الشعوب قطيع؟
خلونا نحترم خيارات بعضنا.. ونكون كلنا ملقحين وغير ملقحين ضد إلزامية اللقاح.
