الصورة أعلاه للمخرج الفنان Garabet Tahmajian
رغم كل التطمين انو متحور أوميكرون مش خطير، وربما يكون بداية لتلاشي فيروس كوفيد 19 ومتحوراته، إلاّ إنو المدير العام لمنظمة الصحة العالمية تيدروس ادهانوم غيبريسوس أشار بوضوح انو جائحة كورونا ما انتهت، وحذّر من الفكرة القائلة “أوميكرون لا يسبّب الأذى”، وشدّد انو أوميكرون بيتسبب بدخول المستشفيات وبوفيات، وحسب قول غيبريسوس حتى لو الحالات أقل خطورة، لكن تثقل كاهل مؤسسات الرعاية الصحية..
بذات اليوم أعلنت السلطات في هونغ كونغ إنو رح يتم إعدام الآلاف من حيوانات الهامستر، من بعد ما تثبت أصابة بعضها بفيروس كورونا، وأكدت وزيرة الصحة في هونغ كونغ انو هالخطوة لحماية المواطنين من بعد ما تأكد إصابة أحد الموظفين في متجر للحيوانات ومنها الهامستر المصاب، وأضافت الوزيرة صونيا تشان انو عالصعيد الدولي لا يوجد دليل للحظة يظهر انو الحيوانات الأليفة ممكن تنقل فيروس كورونا للبشر..
*****
وبذات اليوم كمان أعلن اختصاصي الوبائيات الروسي اندريه بوزدنياكوف الى انو متحور اميكرون بيتكاثر بسهولة بالشعب الهوائية مقارنة مع متحور الدلتا ونادراً لينزل عالرية، وأضاف خطورة أوميكرون على الأطفال اكثر لانه بسبب التهاب الشعب الهوائية مع مضاعفات..
*****
وأهم خبر بالساعات الماضية كان تحذير بيل غيتس من أوبئة أسوأ من كورونا، داعياً الحكومات لرصد المليارات لمكافحة المرض العالمي المقبل، وأضاف إله المعرفة على الأرض- السيد غيتس- فقد يضطر العالم لمواجهة أمراض تتسبب بمستويات أعلى بكثير بالوفيات..
*****
ما رح نحلّل الأخبار الكورونية السابقة، لكن بمنطق المراقب فينا نأكد انو وظيفة كورونا بعد ما خلصت، واذا خلصت رح يكون في الأسوأ حسب “النبي بيل”، لهيك رجعت ذاكرتي لتموز 2021، وبجلسة مع أحد الأطباء اللبنانيين المغتربين، المتواضع، يللي ما بحب ينعملو دعاية، لأن وضع جهده المهني والطبي والإنساني لخدمة كل مريض بدون تمييز، وبضمير بيوصل الليل بالنهار بدون ما يفكر بربح مادي أو كيف بدو يستفيد من عمولة شركات الأدوية، ومكافأته: كمشة دعاء وصلاة لشخصه ولعيلته..
كان البروفسور راجع من مؤتمر دولي، ورفض يعطي معلومات عن كواليس المؤتمر، واكتفى بالقول: كورونا ما رح يخلص قبل سنوات، وناطر العالم متغيرات كبيرة.
*****
سمحت لحالي انشر هالمعلومات من بعد ما توزع فيديوهيات بتذكّر شو قال سابقاً هالدكتور عن pcr، وكيف اليوم سقطت مصداقية نتائج pcr بأغلب دول العالم، وزادت مصداقية طبيب المحتاجين والموجوعين والمنهكين، وبدون مبالغة.. صار عنده جيش من الاتباع متهمين انن ما بيفهموا بالعلم ومشعوذين.. ما رح ندخل هون بالدفاع او الهجوم، الايام بتحسم مع مين الحق؟
*****
بالنهاية.. الهدف من هالنص قراءة بما يحضّر للعالم على صعيد الجائحة أو ما بعد الجائحة، وما في نيّة لتبييض صفحة طبيب “مغضوب عليه” من المنظومة الصحية والاعلامية، لأنه صريح وصادق وصاحب رؤية..
الهدف كمان من هالنص، استفزاز خوري رعية الناجين من كورونا بأسلوب معالجته يللي بتعتمد على تقويه المناعة وتأمين الاطمئنان للمريض، ليخرج عن صمته، ويرجع إلى الساحة الإعلامية، والإعلام البديل منصة عابرة للقمع لحدا ما، وما في أي إشكال بانقسام الرأي العام معه أو ضده، الإشكال نضلّ نتغنى بالحريات، ونحن بحالة رفض للآخر ولرأيه وللحوار معه..
*****
لازم تكون المبارزة معلومة مقابل معلومة، وحجة مقابل حجة، والقوي يللي بيقنع الناس..
